Brjóstaminnkun

Senda fyrirspurn

Brjóstaminnkun

Það eru margar ástæður fyrir því að konur leita eftir lagfæringu á brjóstum. Algeng ástæða er að konum finnst brjóstin þung og stór sem oft leiðir til vöðvabólgu í öxlum og hálsi. Opin og ítarleg umræða um aðgerðartækni og þínar eigin væntingar leggja grunninn að því að þér líði vel með ákvörðunina um að fara í brjóstaminnkun.

Aðgerðin

Sjálf aðgerðin tekur um 2 klukkustundir og er framkvæmd í svæfingu. Brjóstaminnkun er stöðluð aðgerð þar sem brjóstvefur er fjarlægður í neðri hluta brjóstsins samhliða því sem brjóstvartan er varðveitt og flutt ofar á brjóstinu. Brjóstaminnkun er í eðli sínu minnkun og lyfting í sömu aðgerð. Aðgerðin endurskapar form og hlutföll brjóstanna til hins betra. Eftir aðgerðina er fylgst náið með þér á vöknun og tveimur til þremur tímum eftir að þú vaknar ert þú tilbúin að fara heim.

Þegar heim er komið

Þegar þú ert komin heim tekur þú því rólega. Þú getur búist við að vera aum yfir brjóstveggnum, við djúpan andardrátt eða þegar þú hreyfir upphandleggina. Verkirnir eru þó sjaldan mjög slæmir. Þú mátt gera ráð fyrir að vera frá vinnu í tvær til þrjár vikur. Mikilvægt er að vera í góðum íþrótta eða sjúkrabrjóstahaldara í 4 vikur eftir aðgerð til að veita brjóstunum stuðning.

Eftirfylgd

Fyrsta endurkoma er eftir um það bil viku frá aðgerð. Þá eru skurðsár skoðuð og í þeim tilfellum þar sem varanlegir húðsaumar eru settir í aðgerð eru þeir yfirleitt fjarlægðir í fyrstu endurkomu. Endanlegt form á brjóstinu er ekki komið á þessum tíma því bólga er enn í vefnum sem mun ganga til baka á næstu 4 til 8 vikum. Fyrstu 6 mánuðina eftir aðgerð er brjóstið að setjast eftir lyftinguna sem hefur átt sér stað en eftir þennan tíma er endanlegt form og árangur aðgerðarinnar kominn fram. Boðið er upp á endurkomu eftir þennan tíma ef þess er óskað.

Hagnýtar upplýsingar fyrir og eftir aðgerð

Þú átt að fasta frá miðnætti daginn fyrir aðgerð í svæfingu.
Á aðgerðardaginn ferð þú í sturtu heima og sleppir öllum húðvörum á aðgerðarsvæðinu.
Gott er að mæta í þægilegum fötum og skófatnaði sem létt er að lauma sér í og úr.
Eftir aðgerð í svæfingu skallt þú gera ráðstafanir að verða sótt/ur.
Gott er að skipuleggja vel fyrstu dagarna eftir aðgerð og hafa þér einhvern innan handar til stuðnings.
Til að fá sem fíngerðust ör er ráðlegt að plástra örin í 3 til 6 mánuði með bréfplástrum (t.d. omnistrip) sem fást í flestum apótekum.
Eftir brjóstaminnkun mátt þú gera ráð fyrir að taka því rólega fyrstu vikurnar. Þú mátt byrja að stunda líkamsrækt að nýju eftir um 3 vikur.
Reykingar auka líkurnar á sýkingum, rofi í skurðsári og húðdrepi eftir aðgerð. Reykingarstopp í 6 vikur gildir fyrir allar valkvæðar aðgerðir.
Við skyndilega mikla bólgu eftir heimkomu vaknar grunur um blæðingu. Hafðu þá strax samband. Mestu líkurnar á blæðingu er fyrstu 24 tímanna eftir aðgerð.

515 1600

515 1600

Brjóstaminnkun

Senda fyrirspurn